آندھرا پردیش کے پٹاخہ فیکٹری میں خوفناک دھماکہ، 8 مزدور جاں بحق، کئی زخمی
انکاپلّی (آندھرا پردیش) 13اپریل (حقیقت ٹائمز)
آندھرا پردیش کے انکاپلّی ضلع میں اتوار کی دوپہر ایک پٹاخہ فیکٹری میں زوردار دھماکہ کے نتیجے میں کم از کم 8 مزدور ہلاک اور 7 دیگر شدید زخمی ہو گئے۔ ہلاک ہونے والوں میں دو خواتین بھی شامل ہیں۔یہ افسوسناک واقعہ کوتوراتلا منڈل کے کائیلاسپتنم گاؤں میں پیش آیا، جب دوپہر 12:45 کے قریب فیکٹری کے اندر ذخیرہ کیے گئے آتش گیر مواد میں اچانک آگ بھڑک اٹھی، جس نے پوری فیکٹری کو اپنی لپیٹ میں لے لیا۔ آگ اور دھماکوں کے باعث فیکٹری کی عمارت زمین بوس ہو گئی، جس میں مزدور اندر ہی دب گئے۔پولیس کے مطابق، حادثے کے وقت فیکٹری میں تقریباً 15 مزدور کام کر رہے تھے۔ جائے وقوعہ پر فائر بریگیڈ، پولیس اور مقامی افراد نے فوری امدادی کارروائیاں شروع کیں اور زخمیوں کو قریبی اسپتال منتقل کیا گیا۔ہلاک شدگان کی شناخت دادی رمالکشمی، پورم پاپا، گمپینا وینو، سیناپتی بابوراؤ، منوہر، دیورا نرملا، اپّی کونڈا تھاٹھا بابو، اور سانگری گووند کے طور پر کی گئی ہے۔ یہ تمام مزدور کاکیناڈا ضلع کے سمارلاکوٹا علاقے سے تعلق رکھتے تھے اور فیکٹری میں موسمی روزگار کے لیے آئے تھے۔واقعے کی تحقیقات جاری ہیں، جبکہ فیکٹری میں حفاظتی اقدامات کے فقدان اور لائسنس کی حیثیت کے بارے میں بھی تفصیلات اکٹھی کی جا رہی ہیں۔ریاستی حکومت کی جانب سے ہلاک شدگان کے لواحقین کے لیے امدادی پیکج اور زخمیوں کے علاج کا اعلان متوقع ہے۔
