وقف بل کے خلاف انڈیا بلاک متحد
نئی دہلی _یکم اپریل (حقیقت ٹائمز)انڈیا بلاک کے تمام اتحادی جماعتوں نے چہارشنبہ کی دوپہر کو پارلیمنٹ میں پیش ہونے والے وقف ترمیمی بل، 2025 کے خلاف متحد ہو کر ووٹ دینے کا فیصلہ کیا ہے۔ آر ایس پی کے رکن پارلیمنٹ این کے پریم چندرن نے اس بات کی تصدیق کرتے ہوئے کہا کہ اپوزیشن جماعتیں اس متنازعہ بل کی مخالفت میں یکجہتی کا مظاہرہ کریں گی۔یہ بل وقف بورڈز کے اختیارات میں تبدیلی کا باعث بن سکتا ہے، جس پر مختلف حلقوں میں شدید تحفظات پائے جاتے ہیں۔ ناقدین کا کہنا ہے کہ اس قانون سازی کے ذریعے اقلیتی اداروں پر غیر ضروری مداخلت کی جا رہی ہے، جبکہ حکومت کا مؤقف ہے کہ یہ ترمیم وقف کے انتظامی امور کو مزید بہتر بنانے کے لیے ضروری ہے۔ اپوزیشن کا الزام ہے کہ حکومت اس بل کے ذریعے اقلیتوں کے مذہبی امور میں بے جا مداخلت کرنا چاہتی ہے، جو آئینی حقوق کے منافی ہے۔
کل لوک سبھا میں اس بل پر بحث اور ووٹنگ متوقع ہے، جہاں حکومت کی عددی برتری کے باوجود اپوزیشن جماعتیں اپنی شدید مخالفت ریکارڈ کرانے کا ارادہ رکھتی ہیں۔ سیاسی ماہرین کے مطابق یہ معاملہ نہ صرف حکومت اور اپوزیشن کے درمیان ۔شدید کشمکش کو ظاہر کرتا ہے بلکہ ملک کی سب سے بڑی اقلیت سے جڑا ہوا ہے۔
