عوام کو پولیس سے متعلق امور پر رہنمائی حاصل کرنا ضروری ہے: وزیر احمد
اندرا نگر مسجد کو عوامی خدمت کا مرکز بنانے عبدالرحمن خان کا عزم
بنگلور، 10 مئی (حقیقت ٹائمز)
عوام کے لیے یہ نہایت ضروری ہے کہ وہ پولیس محکمے سے متعلق امور پر بہتر آگاہی، رہنمائی اور مشورے حاصل کریں تاکہ کسی بھی پریشان کن صورتحال کا بخوبی سامنا کیا جا سکے۔ یہ مشورہ ریٹائرڈ ایڈیشنل ڈائریکٹر جنرل آف پولیس، محمد وزیر احمد نے آج دیا۔اندرا نگر، بنگلور کی مسجد ام الحسنین میں منعقدہ ایک آگاہی و بیداری پروگرام سے خطاب کر رہے تھے، جس کا مقصد عوام کو پولیس سے متعلق مسائل پر مشورے اور رہنمائی فراہم کرنا تھا۔وزیر احمد نے کہا کہ مسجد کے صدر عبدالرحمٰن خان نہایت قابلِ تعریف خدمت انجام دے رہے ہیں۔ آج کے اس پروگرام کا مقصد عوام میں پولیس محکمے سے متعلق شعور بیدار کرنا ہے، انہوں نے اعلان کیا کہ مستقبل میں بھی اس طرح کے پروگراموں کا اہتمام جاری رکھا جائے گا۔انہوں نے بتایا کہ جو افراد پولیس سے متعلق کسی بھی مسئلے پر مشورہ یا رہنمائی چاہتے ہوں، وہ مسجد کے دفتر میں اپنا نام، فون نمبر اور مسئلہ درج کروا سکتے ہیں۔ ہر ماہ یا پندرہ دن بعد ایسے پروگرام منعقد کرنے کا منصوبہ ہے۔ مسجد کی انتظامیہ کی جانب سے یہ ایک بہترین کوشش ہے، جو غریب عوام کے لیے نہایت فائدہ مند ثابت ہوگی، اور دیگر مساجد کے لیے بھی ایک نمونہ بن سکتی ہے۔مسجد ام احسنین کے صدر عبدالرحمٰن خان نے کہا کہ ہمارے سابق صدر، ضیاء اللہ خان نے خدمتِ خلق کا جو راستہ دکھایا ہے، ہم اسی راہ پر گامزن ہیں۔ ریٹائرڈ اے ڈی جی پی وزیر احمد کو مدعو کر کے ہم نے عوام کو مؤثر رہنمائی فراہم کرنے کی کوشش کی ہے۔انہوں نے کہا کہ عوام کو ایسے پروگراموں سے بھرپور فائدہ اٹھانا چاہیے۔ وزیراعلیٰ کے سیاسی سیکرٹری، نصیر احمد کو بھی مسجد میں مدعو کیا گیا ہے ، اور ان سے درخواست کی گئی ہے کہ وہ ہر ماہ مسجد کا دورہ کریں اور عوام کی شکایات براہِ راست سنیں اس کے علاوہ، لندن سے ایف۔آر۔سی۔ایس کی ڈگری یافتہ ایک خاتون ڈاکٹر سے بھی رابطہ کیا گیا ہے، جو شام کے اوقات میں مسجد کے دفتر میں خواتین کو مفت طبی مشورے فراہم کریں گی۔ عبدالرحمٰن خان نے اس موقع پر کہا کہ ہماری خواہش ہے کہ مسجد کو صرف عبادت گاہ تک محدود نہ رکھا جائے بلکہ اسے عوامی خدمت کا مرکز بنایا جائے۔اس موقع پر مسجد ام الحسنین کے خازن سہیل لالا میاں اور رکن، جلال الدین بھی موجود تھے۔
عوام کو پولیس سے متعلق امور پر رہنمائی حاصل کرنا ضروری ہے: وزیر احمد
